Eph 2 | MHL | STEP | Aria ni iiriw sira samo-samora ne pina onam-ikeman. Naapeya ni umemi mesenalowa-ke.

Ephesians 2

I umep iikirap Krais wameiya ikemik

1 Aria ni iiriw sira samo-samora ne pina onam-ikeman. Naapeya ni umemi mesenalowa-ke. 2 Naap ikok ni miiw sira samora-pa yiawem-ikeman. Ne yiena inasina makena-ke naemi sira-sira onam-ikeman. Wi Mua Maneka opora mikikira iwimik nain wi inasina nain-ke kema wia mikam-ikaeya wi sira-sira onimik. Ne nis pun wiar ookam-ikeman. 3 I unowiya iiriw wi teeria nain wiamiya ikok yiena mia kookalowa nan sira samora ookami pina onam-ikemik. I woosa kema nain manekiw ikemik. I unowiya naap ikemik nain Mua Maneka yia sirirowa wiar ikua. 4 Pepek, yiena pina-ke yia ifakimeya Mua Maneka mokoka-pa umowa saarik ikemik. Nain os-ke manek akena yia kemalek. Naeya i Krais teeria wiar ekap iikirowa saarik ikemik. Ae makena, Mua Maneka-ke yia kemalep yia aawok. 6 Krais iikirowami is pun o wameiya yia iikirowak. Ne yia aawep owow iinan-pa yia wueya i Krais wameiya-pa pokimik. 7 Ne Yeesus Krais naep yia kemalep yia saliwowiw ikaiya. Manek akena yia kemalowiw ikaiya nain, epa kireya enuma imenarem-ikaiya nain pun naap yia kemalowiw ikainon. 8 Moram ni Krais opora wiar opiwkin Mua Maneka-ke nia kemalep nia aawok. Nieniw Mua Maneka wameiya ekowa me pepekeya ona nia asipap nia aawok. 9 Ona nia aawok nain me niena sira eliwa onam-ikaiwkin nia aawok, weetak. Naapeya mua kuisow ona unuma wame pirami me mainon, “Yo sira eliwa onamkun Mua Maneka-ke efa aawok,” weetak, naap maowa me pepek. 10 Moram Mua Maneka-ke kema yia kiripeya emeria mua enuma kiremik. O i Yeesus Krais wameiya ikok era eliwa-pa soomareka naep kema yieya ookimik. Nain ona iiriwiw naap maep oneya i sira eliwa ookimik.

I Krais wameiya epaskun ikemik

11 I Isrel unowiya mia kanima puukimik. Naeya i mia kanima puukowa naap yiam maimik. Ne ni owow oko oko mia kanima me puukiman nain feenap nia maimik, “Wi mua mia kanima puukowa marewa-ke.” (Mia kanima puukowa-na wiena mua-ke mia-pa onimik, muut naap.) 12 Aria ni baliwep kema wuepeka, ni iiriw teeria nain-ke, ni Krais teeria-pa me wiar ikeman. Ni teeria oko-ke. Iir nain Mua Maneka-ke i Isrel opora yia maakep koonowap epa eliwa yia wuap-puomak. Nain ni sisina-pa ikeman. Ni Mua Maneka wameiya-pa me ikeman, ne o kemena-pa me wiar ikeman, naapeya maa eliwa ikoka imenarowa nain, ni weetak akena. 13 Ne aria aakisa Yeesus Krais umemi aka orok nain-pa nia aaweya o ekima-pa Mua Maneka wameiya akena-pa wiar ikeman.

14 Moram Krais ona kema eliwa yieya i unow onaiya wueliwa ikemik. Feenap, iiriw i Yuuda teeria-ke wi owow oko oko yiam irewap ikok pika wenu-wenup ikowa saarik ikemik. Naap ikemkun Krais-ke umemi pika nain teekap oromi yiam iiwuarowa sira nain pun iiwawun weeser-wuak. Ne teeria erup nain yia aaweya iiwawun epaskun akena ikemik. 15 Os-ke umemi iiriw Moses sira wuomakek nain ne sira papako maemik nain irinak. Naap onami teeria erup nain yia aawep teeria enuma kuisow kema kuisow yia arowinen naep naap onak. 16 Teeria erup nain iiriw yiam iiwuarem-ikemkun yia fiirimep ona mia kuisow yia arowak. Ne Mua Maneka kemena-pa yia pekak. 17 Ne ekapep opor eliwa feenap maek, “Ni aakisa kema eliwa ne kema kuisow ikeka.” Opora nain manekami i Yuuda yia maakemi ni owow oko oko pun nia maakek. 18 I teeria erup nain Krais ekima-pa Auwa wameiya arep maa nokarimik. Ewar Eliwa waisow kema kuisow yia wueya naap onimik.

I Krais teeria unowa i Mua Maneka koora-ke

19 Aria naapeya ni aakisa purer mua saarik me ikeman, weetak. Sisina-pa me ikeman. Ni Mua Maneka teeria wiamiya epaskun akena ikeman. Naemi Mua Maneka kemena kakeniw wiar ikeman. 20 Feenap, Mua Maneka-ke koora kuam-ikaiya, ne ni koora nain-ke. I aposel ne wi profet i koor wapen poka saarik, ne Krais ona umua poka-ke. 21 I koor maakara saarik, unowiya Krais mikowawamkun koora nain koonep manekarem-ikainon. Ne koora nain Krais ona nan ikaiya. I unowiya Mua Maneka tempel koora kuisow aremik. 22 Ne nis pun Krais wameiya arep ona koora nain iiwawun kuisow areman. Ne Mua Maneka Ewar Eliwa koora nan ikaiya.